རང་རེའི་སློབ་གྲྭའི་2017ལོའི་མཐོ་འབྲིང་མཐར་ཕྱིན་མཛད་སྒོ་སྤེལ་བ།

        དབྱར་ཟླ་དྲུག་པ་སྟེ་ལོ་ཏོག་གི་འབྲས་བུ་སྨིན་ལ་ཉེ་བའི་དུས་ཚིགས་འདིར། མཐོ་འབྲིང་མཐར་ཕྱིན་འཛིན་གྲྭའི་དགེ་སློབ་ཡོངས་རང་སློབ་གྲྭའི་ཚོགས་ཁང་ཆེན་མོར་འཛོམས་ནས་ཉིས་སྟོང་བཅུ་བདུན་ལོའི་མཐོ་འབྲིང་མཐར་ཕྱིན་གྱི་མཛད་སྒོ་སྤྱི་ཟླ་དྲུག་པའི་ཚེས་གཉིས་ཉིན་སྤེལ་བ་རེད།
       སྤྱི་ཟླ་དྲུག་པའི་ཚེས་གཉིས་ཀྱི་ཉིན་མོ་འདི་ནི་དགའ་བ་སུམ་འཛོམས་ཀྱི་ཉིན་མོ་ཞིག་སྟེ། ངེད་གཅན་ཚ་རྫོང་མི་རིགས་སློབ་འབྲིང་གི་མཐོ་འབྲིང་སློབ་མ་བརྒྱ་དང་དོན་གཅིག༼རིག་ཚན་ལ་སློབ་མ་རེ་བརྒྱད་དང་རྩིས་ཚན་བརྒྱ་དང་གསུམ་ཡོད།༽གིས་ལོ་ངོ་གསུམ་གྱི་རིང་ལ་འབད་བརྩོན་བྱས་ཏེ་དེ་རིང་དངོས་སུ་མཐོ་འབྲིང་ནས་སློབ་མཐར་ཕྱིན་སོང་བ་དང་། ཁོ་ཚོ་རྒྱལ་ཁའི་ངང་མཐར་ཕྱིན་སོང་བས། ང་ཚོ་དགེ་རྒན་རྣམས་སེམས་པ་ཤིན་ཏུ་དགའ་ཞིང་། ཁོ་རང་ཚོའི་ཁྱིམ་བདག་རྣམས་ཀྱང་དེ་བཞིན་དུ་སེམས་པ་དགའ་བས། དངོས་གནས་སློབ་མ་དང་དགེ་རྒན། ཁྱིམ་བདག་གསུམ་ཀ་དགའ་སྤྲོ་རབ་ཏུ་རྒྱས་པའི་དགའ་བ་སུམ་འཛོམས་ཀྱི་དུས་ཆེན་ཁྱད་པར་བ་ཞིག་རེད། 
       རེད་དེ། མཐོ་འབྲིང་གི་དུས་སྐབས་ནི་མི་ཚེའི་སློབ་སྦྱོང་གི་གོ་རིམ་ཁྲོད་ནས་ཆེས་གལ་ཆེ་ཤོས་དང་མི་སྒེར་སོ་སོའི་མི་ཚེའི་བརྒྱུད་རིམ་ཁྲོད་ཀྱི་དུས་སྐབས་གལ་ཆེན་ཞིག་ཡིན་པས། དེ་རིང་གི་མཐར་ཕྱིན་མཛད་སྒོའི་སྟེང་སློབ་མའི་སྐུ་ཚབ་པས་ཁོ་ཚོས་ལོ་ངོ་གསུམ་པོ་འདིའི་རིང་ལ་དགེ་རྒན་རྣམ་པའི་བཀའ་དྲིན་ལ་བརྟེན་ནས་ཤེས་བྱ་སྣ་མང་ལ་འབད་བརྩོན་བྱས་ཚུལ་དང་། དཀའ་སྤྱད་འབད་བརྩོན་བྱས་པས་སློབ་སྦྱོང་ཐད་ནས་གཡུར་ཟའི་གྲུབ་འབྲས་བླངས་པ་མ་ཟད། སློབ་སྦྱོང་ལ་དགའ་སྣང་དང་སྤྲོ་སྣང་བྱུང་ཚུལ་དང་། དཀའ་སྡུག་དང་དུ་ལེན་ཐུབ་པའི་སྙིང་སྟོབས་རྒྱས་ཚུལ། མ་འོངས་པའི་ཕུགས་བསམ་ཡག་པོ་རྒྱས་ཚུལ་སོགས་བཤད་སོང་ལ། སློབ་གྲྭའི་འགོ་ཁྲིད་དང་དགེ་རྒན་གྱི་སྐུ་ཚབ་པ་སློབ་གཙོ་ལོ་བྷེས་བསླབ་བྱ་ཡོངས་ཀྱི་དགེ་རྒན་དང་ཁྱད་པར་དུ་ཉིན་མཚན་བལྟོས་མེད་དུ་སློབ་མའི་སློབ་སྦྱོང་དང་འཚོ་བ། བདེ་ཐང་ཕྱོགས་ཡོངས་ལ་འགན་ལེན་བྱེད་པའི་འཛིན་བདག་རྣམ་པའི་ཚབ་བྱས་ནས། ལོ་ངོ་གསུམ་པོ་འདིའི་རིང་ལ་དགེ་རྒན་རྣམ་པས་དཀའ་སྡུག་སྡུག་ཏུ་མ་བཟུང་ཞིང་བསླབ་འབྲས་གཟི་བརྗིད་དུ་བརྩིས་ནས། ཁྲིད་ཐབས་དང་བྱེད་ཐབས་སྣ་ཚོགས་པའི་སྒོ་ནས་སློབ་མའི་ཤེས་ཡོན་གོང་དུ་སྤེལ་བར་འབད་པ་བྱས་ཚུལ་དང་། སློབ་མའི་སེམས་ཁམས་དང་ལུས་ཕུང་བདེ་ཐང་ཡོང་བ་དང་། ཆ་ལུགས་དང་སྤྱོད་ལམ་ལེགས་ལམ་དུ་འདྲེན་པ། མ་འོངས་པའི་ཕུགས་རེ་བརྟན་པར་བྱས་ཚུལ་སོགས་སྤྱོད་ཡོན་གཉིས་ལྡན་དང་དགའ་སྐྱིད་གཉིས་ལྡན་གྱི་སློབ་མ་སྐྱེད་སྲིང་བྱས་ཚུལ་དང་དེར་གྲུབ་འབྲས་ལེགས་པོ་ཐོན་ནས་ཁོང་ཅག་དགའ་བ་རྒྱས་ཡོད་ཚུལ་གསུང་བྱུང་། དེ་བཞིན་སློབ་གཙོ་སྐར་མ་སྐྱབས་ལགས་ཀྱིས་ཀྱང་སློབ་འབྲིང་གི་དུས་སྐབས་ནི་སློབ་མའི་ཤེས་ཡོན་གྱི་རྨང་གཞི་བརྟན་ཆགས་འབྱུང་བའི་དུས་སྐབས་ཁྱད་པར་བར་གནས་ཡོད་ཚུལ་དང་། དེར་གནས་པས་སློབ་འབྲིང་སྐབས་སློབ་སྦྱོང་ལེགས་པོ་མ་བྱུང་ན་རྗེས་མར་ཚད་མཐོན་པོའི་ཤེས་ཡོན་དང་དུ་ལེན་པར་དཀའ་ཁག་ཆེ་ཚུལ། དགེ་སློབ་ཟུང་འབྲེལ་གྱི་དཀའ་སྤྱད་ལ་བརྟེན་ནས་གྲུབ་འབྲས་ལེགས་པོ་བྱུང་ཚུལ། མཐོ་འབྲིང་གི་ལོ་དུས་འདི་ནི་མི་སྒེར་གྱི་རང་གཤིས་དང་ལྟ་སྤྱོད་གྲུབ་པའི་དུས་མཚམས་ཁྱད་པར་བར་གནས་ཚུལ་དང་། དེར་གནས་པས་དགེ་རྒན་རྣམ་པ་དང་སློབ་གྲྭར་འགན་འཁུར་ལྕི་ལུགས་དང་དགེ་རྒན་རྣམ་པའི་ཁྲིད་སྟོན་འོག་སློབ་མ་རྣམས་སྤྱོད་ཡོན་གཉིས་ལྡན་དང་དགའ་སྐྱིད་གཉིས་ལྡན་གྱི་སློབ་མ་བཟང་པོར་འཚར་ལོངས་བྱུང་ཚུལ་སོགས་གསུང་བྱུང་སྟེ། དེ་རིང་ནི་དངོས་གནས་རྒྱལ་ཁ་དང་གྲུབ་འབྲས་ཀྱིས་གཏམས་ཤིང་དགའ་སྐྱིད་དང་དགོད་སྒྲས་ཁྱབ་པའི་ཉིན་ཞིག་རེད།